Aprel ayının ortalarından sonuna qədər göy üzündə Lirid meteor yağışı müşahidə ediləcək.
Maya.news xəbər verir ki, bu barədə Bakı Dövlət Universitetinin (BDU) Astrofizika kafedrası məlumat yayıb.
Meteor yağışının maksimumu 22 apreldə, Bakı vaxtı ilə saat 22:04-də baş tutacaq.
Bu vaxt saatda 18-20 meteor müşahidə ediləcək.
Bakıda meteor seli aprelin ortasından sonuna qədər hər axşam saat 20:18-dən sonra müşahidə edilə bilər.
Meteorları ən yaxşı görmə saatları isə sübhə yaxın saatlardır.
Belə ki, Yerin fırlanması səbəbindən həmin vaxt Bakı gələn meteorların hərəkəti istiqamətində olacaq, bu da maksimum sayda meteor müşahidə etməyə imkan verəcək.
Lirid meteor seli C/1861 G1 (Tetçer) adlı uzunperiodlu kometlə əlaqəlidir.
Bu komet 5 aprel 1861-ci ildə həvəskar-astronom A. E. Tetçer tərəfindən kəşf edilib.
Komet hər 415 ildən bir Günəş ətrafında dövr edir və hərəkəti zamanı toz və qaz hissəcikləri buraxır.
Yer hər il aprel ayında bu qalıq axınından keçdiyi üçün Lirid meteor yağışı müşahidə edilir.
Bu hissəciklər Yer atmosferində yanaraq, göydə qaçan işıqlı parıltılar əmələ gətirir.
Liridlər ən qədim meteor yağışlarından biridir. Bu yağışı təxminən 2700 ildir ki, müşahidə edirlər.
Onun ilk müşahidəsini eramızdan əvvəl 687-ci ildə çinli astronomlar aparıblar.
